Мектепке дейiнгi бiлiм беру саласында мемлекеттiк қызметтер көрсету қағидалары

1-тарау. Жалпы ережелер

1. Мектепке дейiнгi бiлiм беру саласында мемлекеттiк қызметтер көрсету қағидалары (бұдан әрi — Қағидалар) Қазақстан Республикасы Конституциясы, Қазақстан Республикасы "Бiлiм туралы", "Педагог мәртебесi туралы", "Арнаулы әлеуметтiк қызметтер туралы", "Қазақстан Республикасындағы баланың құқықтары туралы", "Кемтар балаларды әлеуметтiк және медициналық-педагогикалық түзеу арқылы қолдау туралы", "Әскери қызмет және әскери қызметшiлердiң мәртебесi туралы", "Қазақстан Республикасының арнаулы мемлекеттiк органдары туралы" заңдарына, "Мемлекеттiк қызметтер көрсету туралы" 2013 жылғы 15 сәуiрдегi Қазақстан Республикасы Заңының 10-бабының 1) тармақшасына, "Неке (ерлi-зайыптылық) және отбасы туралы" Қазақстан Республикасының Кодексiне сәйкес әзiрленген.

2. Қағидалар түрiне, меншiк нысанына және ведомстволық бағыныстылығына қарамастан мемлекеттiк бiлiм беру тапсырысы орналастырылған мектепке дейiнгi ұйымдардағы бос орындарға мектеп жасына дейiнгi балаларды қабылдау (кезекке қою, жолдамаларды беру, құжаттарды қабылдау, мектепке дейiнгi ұйымға қабылдау) тәртiбiн айқындайды.

3. Осы Қағидаларда мынадай негiзгi ұғымдар пайдаланылады:

1) архив — мектепке дейiнгi ұйымға қабылдауға жолдаманы табысты алуға байланысты немесе осы Қағидаларда көзделген басқа да себептер бойынша кезектен алынған өтiнiштер жиынтығы;

2) блокчейн технологиясы — түзетуге жатпайтын деректерге өзгерiстер енгiзудi сәйкестендiруге мүмкiндiк беретiн белгiлi бiр қағидалар бойынша деректердi сақтау және өңдеу архитектурасын құру тәсiлi;

3) бос орын — баланы мектепке дейiнгi ұйымға қабылдау үшiн мектепке дейiнгi ұйым, жас тобы, тәрбиелеу және оқыту тiлi, жас кезеңi, топтың түрi (жалпы дамытушы, арнайы), жұмыс тәртiбi (толық күн болатын, жарты күн болатын, тәулiк бойы болатын), қабылдау тәртiбi (жалпыға бiрдей белгiленген, ерте брондау, уақытша болу), мектепке дейiнгi ұйымға баратын күнi бойынша шектеулердiң болуын және қабылдаудың басталатын күнi көрсетiлген бос орын туралы ақпарат;

4) босаған орындар бюллетенi — кезектiлiктi басқару жүйесiне бөлу үшiн мектепке дейiнгi ұйымдардан бос орындарды беру хронологиясын күн сайын тiркейтiн хаттама;

5) жалпыға бiрдей белгiленген қабылдау тәртiбiндегi бос орын — жолдама алғаннан кейiн жолдаманың қолданылу мерзiмi бiрден есептелетiн бос орын;

6) ерте брондау тәртiбiндегi бос орын — орын нақты босағанға дейiн ерте жолдама алуға болатын бос орын; жолдаманың қолданылуын есептеу мерзiмi және мектепке дейiнгi ұйымға қабылдау рәсiмi орын нақты босатылғаннан кейiн басталады;

7) кезектiлiктi басқару жүйесi — мектепке дейiнгi ұйымдарға кезекке қоюға және орындарды бөлуге өтiнiштердi қабылдаудың бизнес-процестерiнiң автоматты орындалуын қамтамасыз ететiн көрсетiлетiн қызметтi берушiнiң ақпараттық жүйесi;

8) кезектiлiк нөмiрi — осы кезекте басқа да өтiнiштерге қатысты кезектегi өтiнiштер ретi;

9) керi қайтарылып алынған орындар бюллетенi — кезектiлiктi басқару жүйесiне мектепке дейiнгi ұйымдардан бұрын бөлуге берiлген орындарды қайтару (керi қайтарып алу ) хронологиясын күн сайын тiркейтiн хаттама;

10) мектепке дейiнгi ұйымға қабылдауға жолдама (бұдан әрi — жолдама) — мектепке дейiнгi ұйымға қабылдау және тиiстi құжаттарды рәсiмдеу кезеңiнде мектепке дейiнгi ұйымнан өтiнiш берушiге орынның уақытша сақталуы туралы хабарлама;

11) өтiнiштер кезегi (бұдан әрi — кезек) — кезектiлiктi басқару жүйесiнде табысты тiркелген және осы Қағидаларға сәйкес бiр-бiрiне қатысты реттелген мектепке дейiнгi ұйымға қабылдауға арналған өтiнiштер;

12) проактивтi көрсетiлетiн қызмет — қызмет көрсету субъектiсiнiң бастамасы бойынша берiлетiн, қызметтi көрсету үшiн көрсетiлетiн қызметтi алу субъектiсiнiң ұялы байланыс абоненттiк құрылғысы арқылы берiлген келiсiмi мiндеттi түрде қажет болатын, электрондық нысанда көрсетiлетiн мемлекеттiк қызмет;

13) тоқтату парағы — өтiнiш берушiлер тарапынан жiберiлген тәртiп бұзушылық анықталған жағдайда жолдама алу мүмкiндiгi тоқтатылған, кезектен алынған өтiнiштер орналастырылатын уақытша архив;

14) уақытша болуға арналған бос орын — уақытша кеткен тәрбиеленушiнiң мектепке дейiнгi ұйымда сақталатын бос орны, сондықтан осы орынға қабылданатын баланың келу мерзiмi шектеулi